صطيف صباحو 🤚
180 هلا وغلا
صطيف زكاتك بدي صحن بيض وربطة خبز وعلبة لودالين وكيس ديربي للصغيرة....وسجلون على الدفتر....
180 تكرم عينك.....
صطيف دخلك عمي 180...... لك والله كل مرة بدي أسألك وبنسى.... شو يعني ضمان براغماتي ؟!!!!!!
180 رح اشرح لك..... شوف... هي دفتر ديون الزباين... وهي صفحتك... وحسابك حوالي مليون وميتين الف.....وكسور طيب ليش انا عم اعطيك بالدين ؟ السبب هو عامل الثقة القديم..... وضيف عليهم الوعود والتطمينات يلي انت عم توعدني فيون انو براس الشهر على الراتب رح تجي لعندي تسكر الحساب....... بس في حال متت انت او بدلت ولائك ورحت لسمان تاني أو انا صرلي شي او الدكانة نفسها.... او حصل زلزال او انزلاق خطير وخرجت الأمور بسرعة عن السيطرة.... ساعتها خسرتك وخسرت المصاري....
صطيف أوف!!!!!! وبعدين؟!!!!
180 هات الجوال يلي بايدك شوي زكاتك.....
صطيف تفضل
180 اديش بسوى هاد ؟
صطيف يعني اليوم اذا متلو مستعمل وبنفس النضافة... بدك تقول شي ست ملايين او سبعة..... يعني بهي الحيطان...
180 ممتاز.... أصبح رح خليه عندي لاخر الشهر كضمان... وبنهاية اليوم اذا ما اجيت سكرت حسابك..... رح روح تاني اليوم الصبح عند محل الجوال يلي براس الحارة وبيعو بأول سعر يدفع فيه.... وأخصم حسابك ورجعلك الباقي......😊 هاد هو الضمان البراغماتي......
صطيف يسلمو.... فهمت والله فهمت... رجعلي الجوال زكاتك....😅
180 انسى..... رح خليه عندي..... بلا ماتكسب ذنوب بطعمة وبلا طعمة.....😇
والله أعلم 180