الزمان: أيام المدرسة المكان: في المدرسة
وصلنا الصبح بكير وفتنا المدرسة.... استغربت انو كل أساتذة البعث ريتو الله ياخدن جميعا.... جايين كلن بكير... ومجتمعين وعم يوزعو أبتسامات ..... المهم تسكر باب المدرسة وتأخر رن الجرس..... انا هون حسيت بشي غريب....رحت فورا وسألت نيرد الصف ( الولد الدريس ابو نظارات سميكة تبع أول مقعد يلي مستعد يعطيك كليتو بالفحص وما ينقلك جواب واحد.... ودوما بذكر الاستاذ اخر حصة انو نسيان يعطينا وظيفة!!!! ) مشان اخد التيتة....ويلي شككني فيه انو حاطط عطر وجل الشعر ومشكلس حالو!!!! سألتو: في شي مناسبة اليوم؟ النيرد: اي عمي 180 اليوم بدن ياخدونا لمدرسة البنات يلي ناحنا وبعدها بدهن يطلعونا كلنا سوى مسيرة هادفة..... انا: (عم قول بقلبي هادفة يا أبن الكلب....)
رحت فورا لعند عطور و خبرتو انو في مسيرة (هادفة).... وأنا مالي مصلحة.....طبعا عطور متلي... مو من جماعة هادفة..... عطور: بسيطة... تعى معي لخلف البوفية.... رحنا لهنيك في كبل كهربا سميك كتير نازل من الحيط وفي ثقوب بالحيط.. مسكنا الكبل وحطينا رجلينا بالثقوب وتسلقنا الحيط..... وصرنا على سقف البوفيه... وصار سور المدرسة أرتفاعو شغلة متر وشوي... نطينا عليه ومشينا بهدوء وحذر فوق سور المدرسة العالي.. باتجاه أقرب عامود انارة شارع... وكان يبعد عنا حوالي 9 أمتار وعن السور حوالي 40 سم..... الفكرة كانت نصل لعندو ونتمسك فيه وننزل متل رجال الإطفاء وهيك منصير بالشارع الخارجي يلي بجنب المدرسة.... المهم وصلنا على العامود قام قلي عطور ليك مين لحقنا!!!! هاد النيرد ورفقاتو.... سألو عطور بصوت عالي وعصبي.... ليش لاحقنا....على اساس انت ما بتهرب من المدارس؟!!!! رد النيرد ببرود: قررنا انا ولفئاتي نلوح البيت ندرس سوا... احسن ما نتم هون....... بعدين الحيط والعامود ملك للجميع!!!! هز عطور براسو وقلي نزيل على العامود قبلي... نزلت انا ونزل فورا وراي عطور.... واول ما صار على أرض الشارع أطلع هيك وشاف النيرد ورفقاتو النيردية عم يمشو على السور العالي بحذر شديد وخوف... بأتجاه العامود مشان يعملو متلنا.... يحضنوه وينزلو نزلة رجال الإطفاء.....وبنفس الوقت صوت عياط المدير من جوا المدرسة عم يعيط ويصرخ عليهون.... عم يقلن رجاع ولاك هنت وياه!!!!! شكلو حدا شافنا او شافون وراح لعند المدير وطقنا برغي ماكن...
هون عطور نادا عليهن....ولما وقفو واطلعو فيه.. فورا عمل هيك وعبى العامود بزاق من فوق لتحت ومن جميع الاتجاهات!!!!💦 وقلن يلي حابب يمسح وينظف العامود بملابسو يشرف.....😏
وحملنا حالنا ومشينا انا وياه وهو فارط ضحك.... وانا كل شوي عم دير وشي لشوف شو قرر النيرد وجماعتو.... ينزلو على العامود.... ولا يرجعو للمدرسة لعند المدير!!!! عامود مبلول.... أم مدير علول...... ؟
180 & Nerd